ДУШАНБЕ, 09 окт — Sputnik. Вазорати тандурустии Тоҷикистон барои беҳтар намудани сатҳи хидматрасони ба модарону кӯдакон дар беморхонаҳо гурӯҳҳои корӣ таъсис додааст, иттилоъ додааст дафтари матбуотии ин вазорат.
Тибқи иттилои манбаъ, бо мақсади беҳтар намудани сифати хидматрасонии тиббӣ ба модарону кӯдакон дар сатҳи таваллудхонаҳо ва шуъбаҳои таваллудии ҷумҳурӣ тавассути расонидани кумаки машваратӣ ва мониторинги сифати хидматрасонӣ дар доираи Барномаи давлатии рушди соҳаи тандурустии вилояти Хатлон, дар асоси фармоиши вазири тандурустӣ ва ҳифзи иҷтимоии аҳолии Тоҷикистон гурӯҳҳои машваратӣ аз ҳисоби мутахассисони соҳибтаҷрибаи Вазорати тандурустӣ ва ҳифзи иҷтимоии аҳолии Тоҷикистон таъсис дода шудааст.
Зикр шудааст, ки дар асоси фармоиши мазкур, масъулин вазифадор шуданд, ки назорати гузаронидани машваратҳо ва мониторинги фаъолияти гурӯҳҳоро дар зоишгоҳҳо таъмин намоянд.
Инчунин манбаъ қайд кардааст, ки ин гурӯҳ муваззаф аст, вобаста ба натиҷаҳои мониторинги таваллудхонаҳо ба вазорат маълумоти муфассал пешниҳод кунад.