ДУШАНБЕ, 7 окт — Sputnik. Дар ин моҳ қарор аст, Тоҷикистон боз 800 ҳазор воя ваксина алайҳи бемории коронавирус дастрас кунад.
Дар ин бора Вазорати беҳдошт хабар дода, тавзеҳ дод, ки ваксина аз кадом давлатҳо ворид мешавад.
Бинобар иттилои ин ниҳод, дар моҳи октябр 500 ҳазор воя ваксинаи истеҳсоли аврупоии "AstraZeneca" ва 302 ҳазор воя доруи сохти чинӣ - "CoronaVac" ворид мешавад. Алъон корҳои ҳуҷҷатгузорӣ барои ворид намудани ин миқдор ваксина идома дорад.
Қаблан дар доираи барномаи COVAX ба Тоҷикистон 4 861 540 воя ваксин фиристода шуд ва маъракаи ваксиназании шаҳрвандон ҷараён дорад.
Вазорат мегӯяд, ваксиназанӣ феълан бо 5 навъ дору, аз ҷумла "CoronaVac", "AstraZeneca", "Moderna", "Pfaizer" ва "Спутник V" идома дорад.