ДУШАНБЕ, 7 окт — Sputnik. Дар як муассисаи динии музофоти Хусти Афғонистон таркиш рух дод, хабар медиҳад "РИА Новости" бо такя ба мақомоти амниятии ин кишвар.
Ба иттилои манбаъ, дар ин ҳодиса дастикам 7 нафар қурбон шуда, 15 тани дигар ҷароҳатҳои ҷисмонӣ бардоштаанд.
Зимнан намояндагони "Толибон"* изҳор доштаанд, ки таркиш дар натиҷаи инфиҷори норинҷаки худсохт рух додааст.
Маврид ба зикр аст, ки вақтҳои охир дар Афғонистон амалҳои террористӣ рӯ ба афзоиш ниҳодаанд. Аз ҷумла ҳафтаи гузашта дар мадрасаи Идгоҳ ҳодисаи ба ин монанд рух дод, ки дар натиҷа 12 нафар кушта шуда, 32 тани дигар ҷароҳатҳои ҷисмонӣ бардошт.
Ин таркишро ҷангиёни ДОИШ* анҷом доданд ва "Толибон"* аз боздошт се узви ин гурӯҳ хабар дод, ки дар таркиши мадраса гумонбар дониста мешаванд.
*-созмонҳои мамнуъ дар Тоҷикистон ва Русия