ДУШАНБЕ, 6 окт – Sputnik. Дар Тоҷикистон чор ширкати нави сайёҳӣ сабти ном шуд, хабар медиҳад Кумитаи рушди сайёҳии назди Ҳукумати Тоҷикистон.
Ҳамин тавр чор ширкати ҷадиди гардишгарӣ - "Сайри якҷоя", "Маркази байналмилалии омӯзиши забонҳои хориҷӣ", "Масъудиён" ва "Хидматрасонии сайёҳӣ" вориди бозори сайёҳии Тоҷикистон шуд.
Дар баробари ин муҳлати амали иҷозатномаи фаъолияти ширкати "Интурист" тамдид шуд.
Тибқи гузориши Кумитаи рушди сайёҳӣ, имрӯз дар Тоҷикистон 234 ширкати сайёҳӣ соҳиби иҷозатномаи фаъолиятанд. Аз ин теъдод 30 ширкати гардишгарӣ соли 2020 ва 24 ширкат имсол таъсис ёфтаанд.
Гуфта мешавад, чунин иқдом бо мақсади мусоидат ба рақобати озоду солим дар бозори сайёҳии кишвар рӯи даст гирифта шудааст.
Интизор меравад, ки ширкатҳои нави сайёҳӣ бозори гардишгариро дар Тоҷикистон гарм карда, хатсайрҳои нав кашф ва пешниҳод мекунанд.