ДУШАНБЕ, 1 окт — Sputnik. ВУД-и Тоҷикистон мегӯяд, садамаи маргбор 30-юми сентябри соли 2021, тахминан соати 03:20 рух додааст.
Манбаъ афзуд, ронандаи "Хундай-Старекс", сокини 30-солаи ноҳияи Рушон ҳангоми ҳаракат дар шоҳроҳи Ваҳдат-Душанбе дар ҳудуди ҷамоати деҳоти Гулистон аз уҳдаи идораи автомашина набаромада, бо мошини боркаши “Дулон”, таҳти идораи ронандаи 43-сола, сокини ноҳияи Фархор бархӯрдааст.
"Дар натиҷа мусофири автомашинаи "Хундай-Старекс", марди 57-сола, сокини ноҳияи Ёвон ҷароҳатҳои ҷисмонӣ бардошта, дар ҷойи ҳодиса ба ҳалокат расидааст",-омадааст дар иттилоия.
Таъкид шудааст, ки мусофири дигари автомашинаи мазкур, зани 47-сола, сокини шаҳри Душанбе ҷароҳати ҷисмонӣ бардошта, дар беморхона бистарӣ шудааст.
Мақомоти умури дохилии Тоҷикистон мегӯянд, феълан таҳқиқи ин ҳодиса идома дорад.