ДУШАНБЕ, 29 сен — Sputnik. Шаҳрдори Душанбе масъулинро вазифадор намудаст, ки барои омода кардани дегхонаҳои марказҳои барқу гармидиҳӣ ва шабакаҳои гармидиҳанда чораандешӣ намоянд.
Аз ҷумла барои омода намудани биною иншоот барои қабули энергияи гармӣ ва додани шиносномаи қабули энергияи гармӣ, аз таъмир баровардани зеристгоҳҳои барқӣ ва иваз намудани таҷҳизоту хатҳои барқии фарсуда супориш дода шудааст.
Рустами Эмомалӣ хостори захира намудани сӯзишворӣ, равғанҳои молиданӣ, маводҳои зиддилағжиш, омода намудани нақлиётҳои мусофирбари ҷамъиятӣ, техникаву механизмҳои коммуналӣ барои тоза кардани роҳҳо дар фасли сармо шудааст.
Ӯ муҳим хондааст, ки ба миқдори зарурӣ маҳсулоти ниёзи аввалия, бахусус орд, сабзӣ, картошка ва дигар маҳсулот чораҳои зарурӣ андешида шаванд.
Масъалаи таъмири роҳҳою таъмини пардоохти андоз аз масоили дигари ҷаласаи Маҷлиси вакилони халқи Душанбе будаанд.
Ба иттилои шаҳрдорӣ, Рустами Эмомлӣ барои аз байн бурдани бақияпулиҳои андоз, баланд бардоштани дониши андозӣ ва фарҳангии андозсупорандагон, истифодаи самаранок ва мақсадноки маблағҳои буҷетӣ, пешгирӣ аз омилҳои коррупсионӣ дар мақомоти андоз ва кам намудани санҷишҳои бемаврид дастур додааст.