ДУШАНБЕ, 16 сен — Sputnik. Фиристодаи вижаи Амрико дар Афғонистон гуфт, қарори Ашраф Ғанӣ, ки дар мақоми президенти Афғонистон кор мекарду ҳангоми ҳамлаи "Толибон"* аз кишвар фирор кард, тавофуқи ҳосилшуда бо аъзои ин гурӯҳро, халалдор кард, хабар додааст, Sputnik Афғонистон.
Дар мусоҳибае бо "Financial Times" Халилзод гуфтааст, фирори Ғанӣ аз Афғонистон "мунҷар ба шикасти лаҳзаи охири тавофуқнома барои интиқоли қудрат бо "Толибон"* шуд".
Вай афзуд, ИМА дар ниҳоят бо "Толибон"* ба тавофуқ расид, ки нерӯҳои ин гурӯҳ вориди Кобул нашаванд, аммо тасмими Ғанӣ дар бораи тарк кардани Афғонистон халои амниятиро ба вуҷуд овард. Чунин вазъ, ба гуфтаи ӯ, "Толибон"-ро* маҷбур кард, ки худи ҳамон рӯз вориди Кобул шаванд. "Дар натиҷа беназмие дар зимни хуруҷи низомиёну мулкиён ва қатъи музокироти Доҳа ба амал омад",-гуфтааст ӯ.
Фиристодаи вижаи Амрико дар умури Афғонистон гуфт, фирори Ғанӣ боис шуд, то "Толибон"* ду ҳафта пеш вориди Кобул шаванд.
Ба гуфтаи Халилзод, Иёлоти Муттаҳида масъули ин пешомад нест, ки онҳо (ҳукумати Афғонистон ва "Толибон"*) аз музокирот ақибнишинӣ карданд".
Ӯ ҳамзамон гуфтааст, ки Вашингтон аз фирори Ашраф Ғанӣ хабар надошт.
"Толибон"* пас аз эълони ИМА дар бораи хуруҷи нирӯҳояш аз Афғонистон амалиёти густурдаеро барои ғасби қудрат дар Афғонистон оғоз карда, вилоятҳоро яке пайи дигар бо ҷангу бе ҷанг зери идораи худ қарор доданд .
15 август президенти Афғонистон Ашраф Ғанӣ истеъфо дод ва аз ин кишвар фирор кард. "Толибон" (ташкилоти террористии мамнуъ дар Русия ва Тоҷикистон) бидуни ҷанг вориди Кобул шуд.
Низомиёни ИМА то авоили моҳи сентябр Афғонистонро комилан тарк карда, ҳузури қариб 20-солаи низомияшонро дар ин кишвар бо натиҷаи сифр хотима доданд.
* - ташкилоти террористии мамнуъ дар Русия ва Тоҷикистон