ДУШАНБЕ, 14 сен – Sputnik. Дар вилояти Маскав ду муҳоҷири тоҷик дар таҷовуз ва қатли нафақахӯри 67 - сола гумонбар дониста мешаванд.
Кумитаи тафтишотии вилояти Маскав хабар медиҳад, ки ҷасади зани солхӯрда рӯзи 13 сентябр дар як ҷангал, 160 метр дуртар аз боғи "Магистрал - 2", бо аломатҳои марги маҷбурӣ дарёфт карда шуд.
Бар хабари манбаъ, кормандони пулис ду нафареро боздошт намудаанд, ки дар содир намудани ин ҷиноят гумонбар дониста мешаванд. Ҳар дуи онҳо шаҳрвандони Тоҷикистон буда, яке 33 ва дигаре 37 сол дорад.
Гуфта мешавад, каме дуртар аз макони ҳодиса хобгоҳи муҳоҷирон ҷойгир аст. Аммо боздоштшудаҳо на дар ин хобгоҳ, балки дар манзиле иқомат мекарданд, ки он ҷо кор шоғил будаанд.
Манбаъ меафзояд, ҳоло тафтишот алайҳи ин ҳодиса ҷараён дорад ва қонунӣ будани ҳузури онҳо дар Федератсияи Русия низ мавриди таҳқиқ қарор мегирад.