ДУШАНБЕ, 13 сен — Sputnik. Кормандони милиса дар ноҳияи Восеъ аз ҳодисаи куштор хабар медиҳанд, ки дар заминаи муноқишаи миёни ду мард сар задаааст.
Ба гузориши дафтари матбуотии Вазорати умури дохилаи Тоҷикистон, ин ҳодисаи нохуш 10 сентябр, тахминан соати 18:00 рух додааст.
Гуфта мешавад, марди 34-сола, сокини ҷамоати деҳоти Х. Раҷабови ноҳияи Восеъ бо гумони қасдан расонидани зарари вазнин ба саломатӣ дастгир шуд.
Манбаъ меафзояд, миёни боздоштшуда ва марди 29-сола, бегоҳии рӯзи 10 сентябр муноқиша бархостааст, ки дар натиҷа аввалӣ ҳамсояашро шадидан латукӯб намудааст.
ВУД Тоҷикистон мегӯяд, бинобар ҷароҳатҳои вазнин ахирӣ дар ҷойи ҳодиса ба ҳалокат расидааст.
Ба иттилои ин ниҳод, ҳоло аз рӯи ҳодисаи куштор парванда боз шуда, тафтишот идома дорад.