ДУШАНБЕ, 9 сен — Sputnik. Оқохони IV - Шоҳ Карим ал Ҳусайнӣ, пешвои исмоилиёни ҷаҳон ба муносибати 30-солагии истиқлоли давлатӣ ба унвони президенти Тоҷикистон Эмомалӣ Раҳмон номаи шодбошӣ фиристод, хабар медиҳад хадамоти матбуотии президенти Тоҷикистон.
Дар номааш пешвои исмоилиёни ҷаҳон гуфта мешавад, ки "бо хурсандии бепоён дар ин рӯзе, ки Шумо 30-юмин солгарди Истиқлолияти Ҷумҳурии Тоҷикистонро ҷашн мегиред, ман ба Шумо Ҷаноби Олӣ ва тамоми мардуми тоҷик табрикот ва таманниёти неки худро иброз менамоям".
"Имомати Исмоилия ва ниҳодҳои Ташкилоти Оғохон оид ба рушд ба шарикии дарозмуддати мо бо Тоҷикистон содиқ мемонанд, зеро мо кушиш менамоем, ки ҳадафҳои Ҳукумати Шуморо барои беҳтар кардани сифати зиндагии ҳамаи мардуми тоҷик дастгирӣ намоем", - омадааст дар номаи табрикотӣ.
Оқохони IV - Шоҳ Карим ал Ҳусайнӣ гуфтааст, ки дар ин рӯзи фархунда, "дуогӯи сулҳу субот ва шукуфоии кишвари бузурги Шумо мебошам”.
Номаҳои табрикотӣ ба унвони кишвардори Тоҷикистон Эмомалӣ Раҳмон ҳамчунин аз номи Генерал-губернатори Канада Мэри Мэй Саймон ва Президенти Шӯрои Аврупо Шарл Мишел ворид гардидаанд.