ДУШАНБЕ, 7 сен - Sputnik. Раисиҷумҳури ИМА изҳор дошт, ки то эътирофи ҳукумати Толибон* ҳанӯз хеле вақт аст.
Ҷо Байден барои изҳороте ба нишасти матбуотӣ ҳозир шудааст, аммо хабарнигорон суханашро бурида, дар мавриди эътирофи ҳукумати Толибон* суол кардаанд.
"То ин кор ҳанӯз хеле вақт аст. Хеле дур аст", - иттилоъ додааст РИА Новости аз қавли Байден.
Ин дар ҳолест, ки Толибон* рӯзи 6 сентябр аз тасаллуташон бар Панҷшер, охирин музофоти озод аз ҷангиёни ин ҳаракат хабар доданд. Аммо ҷабҳаи муқовимат эълон кард, ки ба куҳҳо ақибнишинӣ намуду муборизаро барои озодию адолат дар Афғонистон идома медиҳад.
Дар ҳамин ҳол сухангӯи Толибон* Забеҳуллоҳ Муҷоҳид гуфт, раванди қабули қарор дар бораи таъсиси ҳукумати нави Афғонистон ба анҷом расидааст, танҳо мушкилоти фаннӣ боқӣ мондааст.
Ӯ рӯзи душанбеи 6 август изҳор дошта буд, ки ҳукумати нави Афғонистон пас аз чанд рӯз эълом хоҳад шуд, аммо санаи дақиқро ном набурд.
*-созмони террористии мамнӯъ дар Тоҷикистон, Русия ва бархе кишварҳои дигар