ДУШАНБЕ, 4 сент – Sputnik. Дар Тоҷикистон 27 ҳолати нави сирояти нави коронавирус ба қайд гирифта шуд, ки ин нисбат ба рӯзи пешин (29 ҳолат) камтар аст, хабар медиҳад хадамоти матбуоти Вазорати тандурустии ҷумҳурӣ.
Аз оғози ҳамагирии вируси корона дар Тоҷикистон, 16 940 нафар ба коронавирус гирифтор шудаанд.
Ҳамчунин қайд карда мешавад, ки дар як рӯзи охир 29 бемор шифо ёфта, ҳамин тавр то 4 сентябр дар кишвар 16776 нафар ин вирусро ба хубӣ пушти сар кардаанд.
Шабонарӯзи гузашта ягон ҳолати марг аз коронавирус ба қайд гирифта нашудааст. Дар маҷмӯъ, 124 бемор аз ин вирус фавтидаанд.
Қобили зикр аст, ки аз моҳи август то кунун дар Тоҷикистон коҳиши шумораи ҳолатҳои нави ин беморӣ мушоҳида мешавад.
Ҳамин тавр, агар дар аввали моҳ ҳар рӯз тақрибан 70 нафар бемор мешуд, дар охири моҳи август ин рақам то 30 нафар коҳиш ёфт.
Ҳамзамон тибқи иттилои мақомот дар кишвар наздик ба 3 миллион тан ваксина гирифтаанд.
Қаблан вазири тандурустии Тоҷикистон Ҷамолиддин Абдуллозода гуфта буд, ки кишвар мавҷи дуввуми COVID-19-ро, ки охири моҳи июн оғоз шуда буд, дилпурона паси сар карда истодааст.