ДУШАНБЕ, 24 авг – Sputnik. Боз як ширкати сайёҳии нав вориди бозори Тоҷикистон шуд, хабар медиҳад Кумитаи рушди сайёҳии кишвар.
Иҷозатномаи фаъолияти ин ширкати навро зимни ҷаласа, раиси Кумитаи рушди сайёҳӣ Тоҷиддин Ҷӯразода ба роҳбари ширкати навтаъсиси "Шумон" Бахтовар Аминзода супориидааст.
Ин ширкат дар шаҳри Ҳисор таъсис ёфтааст. Ҳадафаш рушди туризми дохилӣ бо фарогирии сайёҳии табобатӣ, фарҳангӣ, аграрӣ ва экологӣ гуфта мешавад.
Роҳбари ширкати навтаъсиси "Шумон" Бахтовар Аминзода дар суҳбат бо АМИТ "Ховар" гуфтааст, ки дар оянда, ҳамкориро бо ширкатҳои сайёҳии ҷумҳурӣ ва кишварҳои хориҷӣ, хусусан давлатҳои Осиёи Марказӣ тавсеа мебахшанд.
Ба гуфти ӯ феълан ширкати "Шумон" бо яке аз ширкатҳои сайёҳии Ӯзбекистон- "Самарқанд тревел" гуфтушунид доранд.
Ҳамчунин, Кумитаи рушди сайёҳии назди Ҳукумати ҷумҳурӣ инчунин муҳлати фаъолияти ширкати "Вояж тур"-ро тамдид намудааст.
Феълан дар бозори сайёҳии Тоҷикистон беш аз 230 ширкати сайёҳӣ фаъолият доранд.