ДУШАНБЕ, 19 авг — Sputnik. Дар барқияи Эмомалӣ Раҳмон ба Реҷеп Тайип Эрдуғон аз ҷумла гуфта мешавад: " Хабари ба ҳалокат расидан ва осеб дидани мардум, ҳамчунин харобиҳои зиёд бар асари обхезии шадид дар минтақаҳои наздисоҳилии Баҳри Сиёҳ дар Туркия боиси андӯҳи амиқи мо гардид".
"Дар ин зимн, ҳамдардиву тасаллиёти самимии ин ҷонибро ба мардуми дӯсти Туркия иброз дошта, ба аҳли пайвандону наздикони қурбониёни ин офати табиии фоҷеабор сабри ҷамил ва барои ҳамаи осебдидагон шифои комил хоҳонам", - изҳор доштааст президенти Тоҷикистон дар идомаи паёмаш.
Ёдрас мешавем, ки дар пайи обхезии шадид дар Туркия 77 шаҳрванди ин кишвар ҷон бохтааст.
Чанд рӯз пеш дар шимоли Туркия офати табиӣ сар зад. Обхези соҳили Баҳри Сиёҳро шуста бурд. Вилоятҳои Синоп, Бартин, Қарабук ва Кастамону зарар диданд ва як қатор деҳот бе барқ монданд.