ДУШАНБЕ, 18 авг — Sputnik. Сафорати Афғонистон дар Тоҷикистон гуфт, ки онҳо ноиби аввали президенти Афғонистон Амруллоҳ Солеҳро сарвари қонунии давлат эътироф мекунанд, менависад оҷонсии "Авеста".
Сафири Афғонистон дар Душанбе Муҳаммад Зоҳир Ағбар гуфт, ки пас аз истеъфо ва фирори Ашраф Ғанӣ бар асоси Қонуни асосии Афғонистон, муовини аввали президент Амруллоҳ Солеҳ сарвари давлат мешавад.
Дар мавриди фирори Ғанӣ аз кишвар, дипломати афғон гуфт, ин амал "хиёнат ба ватан ва мардуми худ" аст.
Ба гуфти ӯ, собиқ раиси ҷумҳур бо худ 169 миллион доллар бурдааст.
Ёдрас мешавем, ки 17 август ноиби аввали президенти Афғонистон Амруллоҳ Солеҳ ба ҷои Ашраф Ғанӣ, ки аз Афғонистон гурехт, худро раҳбари нави кишвар эълон кард.
"Ман дар кишвар ҳастам ва тибқи қонун иҷрокунандаи вазифаи сарвари давлат мешавам. Барои таҳкими ин вазифа ман бо тамоми раҳбарони кишвар машварат мекунам", - навиштааст сиёсатмадор дар Твиттераш ва илова кардааст, ки "ӯ ҳеҷ гоҳ зери ҳукмронии Толибон* хам нахоҳад шуд".
Ҳамин тариқ, тибқи муқаррароти Сарқонуни Ҷумҳурии Исломии Афғонистон, дар сурати фирор, истеъфо ё марги президент, муовини аввали ӯ иҷрокунандаи вазифааш мешавад.
Маълум аст, ки ҳоло Солеҳ, эҳтимолан, дар вилояти Панҷшери Афғонистон аст.
* - Ташкилоти террористӣ, ки фаъолияташ дар Тоҷикистон, Русия ва чанд кишвари дигар мамнӯъ аст.