ДУШАНБЕ, 11 авг — Sputnik. Ахиран Ширин Амонзода, вазири меҳнат, муҳоҷират ва шуғли аҳолии Тоҷикистон дар доираи сафари кории худ ба Ӯзбекистон аз марказҳои касбомӯзии шаҳри Самарқанд дидан намуд ва бо ҳокими вилояти Самарқанд Эркинҷон Турдимов мулоқот кард.
Бино бар иттилои дафтари матбуоти вазорати меҳнат ва шуғли аҳолии Тоҷикистон зимни мулоқот тарафҳо қайд намуданд, ки омодасозии кадрҳои коргарии мутобиқ ба талаботи бозори меҳнат яке аз масъалаҳои мубрам ва ҳалталаб мебошад.
“Дар ин замина, ҳокими вилояти Самарқанд аз фаъолияти самарабахши мономарказҳо ёдовар шуда, таъсирнокии ин марказҳоро дар тарбияи кадрҳои коргарӣ муҳим арзёбӣ намуд”, - қайд кардааст манбаъ
Дар ҳамин ҳол, Ширин Амонзода зимни мулоқот таъкид доштааст, ки бинобар сабаби тавъам будани мушкилотҳо дар самти омодасозии кадрҳои коргарӣ дар байни ду кишвар, ба роҳ мондани ҳамкориҳо дар сатҳи маҳал ва вилоятҳои ҳаммарзи ҳарду кишвар ва табодули таҷриба муҳим мебошад.
Гуфт а шудааст, ки ҷонибҳо ба мувофиқа расиданд, ки барои боз ҳам густариш додани муносибатҳои мутақобилан судманд ҳамкориҳоро идома дода, корро дар сатҳи вилоятҳои ҳаммарз густариш диҳанд.