ДУШАНБЕ, 8 авг — Sputnik. Президенти Қирғизистон Содир Ҷабборов дар ҳузури омма ба вазири фарҳанг, сайёҳӣ, иттилоот ва сиёсати ҷавонон Ҳайрат Имоналиев танбеҳ дод, хабар медиҳад Sputnik Қирғизистон.
Ин қазия дар майдони Ала-Тоо, дар маросими пешвозгирии мунтахаби кишвар дар олимпиадаи Токио, ба вуқӯъ пайваст.
Аввал кишвардор суханронӣ карда олимпичиёнро хушомадед гуфт. Баъд барои суханронӣ дорандаи медали нуқраи Бозиҳои олимпӣ Айсулуу Тинибекооваро даъват карданд. Пасон бори дигар Ҷабборов сухан гуфта ба варзишкорон туҳфаҳо ваъда кард.
Дар ҳамин ҳол ҳаводорон исми дорандаи медали нуқра Акжол Маҳмудовро садо карданд.
Вазир модератори ин чорабинӣ буд ва суханро ба Акжол дода қайд кард, ки ин корро ба хотири "ҳаводораш кард". Дар ҳамин ҳол кишвардор аз он, ки ба дигар ширкаткунандагони олимпиада аз ҷумла ба дорандаи медали биринҷӣ Мээрим Ҷуманазарова сухан надоданд ба ғазаб омада бори дигар назди баландгӯяк омад.
"Ташкилкунандагон камбудиҳо доранд. На ба ҳама ғолибон сухан дода шуд. Акнун, ҳама сухан гуфтанд. Ман ба вазири фарҳанг танбеҳ медиҳам. Ба ҳама ташаккур, дар оянда мо натиҷаҳои беҳтар ба даст хоҳем овард", - гуфт ӯ.
Қисми расмии чорабинӣ ба охир расид ва ба ифтихори бозгашти тими олимпӣ консерт баргузор шуд.