ДУШАНБЕ, 3 авг — Sputnik. Мақомоти шаҳри Хуҷанд хабар дод, ки дар шаҳр чанд нуқтаи ваксинагирӣ бар зидди коронавирус фаъолият дорад.
Ба иттилои дафтари матбуоти мақомоти шаҳри Хуҷанд имрӯзхо дар шаҳр дар 6 адад марказҳои саломатии шаҳри Хуҷанд ва бозорҳои "Панҷшанбе" ва "Афросиёб" нуқтаҳои ваксиназанӣ бар зидди бемории короновирус фаъол аст.
Бино бар иттилои манбаъ, ваксинагирӣ сокинон ва меҳмонони шаҳр аҳли хонавода ва коргоҳро аз бемории COVID-19 эмин нигоҳ медорад.
Мақомоти шаҳри Хуҷанд аз сокинон даъват кардааст, ки бо сабаби хуруҷи мавҷи дуюми бемории COVID-19 дар Тоҷикистон ба муассисаҳои кӯмаки аввалияи тиббию санитарии макони зист барои ваксиназанӣ ҳозир шаванд.
“Зеро ваксинатсия ягона роҳи наҷот аз бемории сироятии коронавирус маҳсуб мешавад”, - таъкид доштааст манбаъ.
ҳамзамон манбаъ қайд кардааст, ки ҳолатҳое ҳастанд, ки шаҳрвандон баъд аз ваксинатсия ба муассисаҳои табобативу профилактикӣ муроҷиат мекунанд ва мақомот гуфтааст, ки ин ҳолати муқаррарӣ аст ва пас аз тазриқ дар организми бархе нафарон аксуламал ба вуҷуд меояд.
“Ин ягон ҳолати нигаронкунанда надорад. Шаҳрвандон дар ин ҳолат тибқи нишондодҳои табибони оилавӣ ва мутахассисони соҳа бояд аз доруҳои табшикан истифода намоянд”, - зикр кардааст манбаъ.