ДУШАНБЕ, 25 июл – Sputnik. Шаббос Негматуллоев дар даври 1\16 ниҳоӣ мағлуб гардид ва ҳамин тавр, аз идомаи мусобиқот маҳрум шуд.
Муштзани тоҷик дар вазни то 81 кило аз рақиби чиниаш Даксианг Чен шикаст хӯрд.
Ҳамин тавр, Шаббос аз идомаи рақобат дар Бозиҳои олимпии Токио - 2020 маҳрум шуд.
Бояд гуфт, муштзани дигари тоҷик - Баҳодур Усмонов хушбахтона рақобаташро бобарор оғоз кард.
Усмонов дар даври аввали сабқати муштзанӣ дар вазни то 63 кило муштзан аз Ҷумҳурии Доминикана - Леонел де Лос Сантосро мағлуб карда, ба даври ҳаштякфиналии Бозиҳои олимпӣ роҳ ёф.
Ёдовар мешавем, ки Тоҷикистонро дар Бозиҳои олимпии Токио - 2020, 10 варзишгар: муштзанҳо - Баҳодур Усмонов, Шаббос Негматуллоев, Сиёвуш Зуҳуров, дар риштаи варзиши сабук - Илдар Аҳмадиев, дар ҷудо - Сомон Маҳмадбеков, Акмал Муродов, Комроншоҳ Устопириён, Темур Раҳимов ва дар шиноварӣ Анастасия Тюринаю Олимҷон Ишанов намояндагӣ мекунанд.
Қаблан ҳарифони ҷудоҷиёни тоҷик низ маълум гардиданд.
Нахуст аз миёни ҷудочиёни тоҷик Сомон Маҳмадбеков ба майдон мебарояд. Мусобиқаи ӯ рӯзи 26 июл соати 07:00 дақиқаи ба вақти Душанбе оғоз меёбад.
Ҳарифи ӯ Аҳмад Аликай мебошад, ки намояндаи Дастаи мунтахаби гурезаҳо аст.
Рӯзи 27 июл, Акмал Муродов бо ҳарифи худ Ҷоштер Эндрю аз Гуам вориди майдони қувваозмоӣ мешавад.
Рӯзи баъдӣ мусобиқаи Комроншоҳи Устопириён бо намояндаи Фаронса Алекс Клергет баргузор мегардад. Ва ниҳоят рӯзи 30 июл намояндаи охирони Тоҷикистон дар риштаи дзюдо Темур Раҳимов бо ҳарифи худ аз Куба, Эндӣ Гранда қувваозмоӣ мекунанд.
Муҳорибаи ҳамаи дзюдочиёни тоҷик соати 07:00 дақиқаи ба вақти Душанбе доир хоҳад шуд.