ДУШАНБЕ, 25 июл – Sputnik. Маркази зилзиласанҷии Тоҷикистон соати 00:31-и рӯзи 25-уми июл дар шарқи ҷумҳурӣ заминҷунбиро ба қайд гирифтааст.
Тибқи иттилои КҲФ, маркази зилзила дар 165 километрии шимолу шарқи шаҳри Душанбе, 21 киломатр шимолтар аз маркази ноҳияи Рашт буда, қувваи зилзила дар марказаш 3-4 балл ва дар ноҳияи Тоҷикобод 3 баллро ташкил дод.
Кумитаи ҳолатҳои фавқулодда ва мудофиаи граждании Тоҷикистон мегӯяд, дар натиҷаи заминларза хисорот ва талафоти ҷонӣ ба қайд гирифта нашудааст.
Ин бори чандум аст, ки шарқи Тоҷикистонро заминларза такон медиҳад. Заминларзаи пурқурбонӣ субҳи 10 июл, соати 07:14 ба вақти Душанбе дар ноҳияи Тоҷикобод рух дод, ки қувваи он дар марказ ҳудуди 5,9 бал арзёбӣ шуда буд.
Бар асари ин офати табиӣ, панҷ сокини деҳаи Бӯстон, собиқ деҳаи Кӯли болои ҷамоати Лангари Шоҳи ноҳияи Тоҷикобод зери хок монда, ба ҳалокат расиданд. Ҳамчунин даҳҳо хона дар деҳоти Тоҷикободу Рахш хароб гардиданд.
Ҳукумати Тоҷикистон комиссияи махсусе таҳти роҳбарии сарвазир Қоҳир Расулзодаро ташкил кард, ки ба бартарафсозии оқибатҳои заминларза машғул мебошад.