ДУШАНБЕ, 19 июл — Sputnik. Кӯмаки тиббии Арабистони Саудӣ ба Тоҷикистонро муовини вазири тандурустӣ Шодихон Ҷамшед аз сафири он кишвар дар ҷумҳурӣ қабул кард. Ин кӯмак ба хотири муборизаи бештар бо маризии коронавирус фиристода шудааст.
Маросими супоридани кӯмаки тиббӣ дар бинои Сафорати Арабистони Саудӣ дар Душанбе сурат гирифт.
Валид Абдурраҳмон ар-Рушайдон аснои супоридани кӯмак ба Шодихон Ҷамшед изҳор дошт, ки ин кӯмакро шоҳ Салмон ба Тоҷикистон фиристодааст ва барои ӯ боиси ифтихор аст, ки аз номи Шоҳ ба намояндаи вазорат онро таслим кунад.
Маблағи умумии кӯмак 500 ҳазор доллар буда, он аз ду қисм ибора аст. Қисмати аввалро қаблан Тоҷикистон қабул намуда буд.
Кӯмаки ирсолнамудаи Арабистони Саудӣ аз ниқобу дастпӯш ва либоси махсуси муҳофизатӣ иборат аст.
Шодихон Ҷамшед таъкид намуд, ки Тоҷикистон бори нахуст аз Арабистони Саудӣ кӯмак қабул намекунад ва ин кишвар борҳо ҳам дасти кӯмак дароз намуда буд.
Муовини вазир аз ҷумла зикр намуд, ки Арабистони Саудӣ ба Тоҷикистон мошинҳои сайёри тиббӣ фиристодааст, ки рӯзҳои наздик рӯнамоии онҳо баргузор мешавад.