ДУШАНБЕ, 14 июл - Sputnik. Ишғоли қаламравҳои назаррас аз ҷониби Толибон* дар Афғонистон маънои суқути ҳукумати ҷумҳуриро надорад. Дар ин бора намояндаи вижаи Президенти Федератсияи Русия оид ба Афғонистон, директори департаменти дуюми Осиёи Вазорати корҳои хориҷии Русия Замир Кобулов дар суҳбат бо РИА Новости изҳор дошт.
Ба гуфтаи ӯ, шиддат гирифтани вазъ дар кишвар натиҷаи ҳузури низомиёни ИМА ва НАТО буд, ки ваъдаи худро иҷро накарданд ва сарбозони афғонро барои муқовимат бо Толибон* омода накарданд.
"Мо набояд фаромӯш кунем, ки аксари ноҳияҳо бидуни ҷанг ба дасти Толибон* гузаштанд. Ва ин чӣ маъно дорад? Нерӯҳои ҳукуматӣ гарнизонҳо ва мавқеъҳои худро тарк карда, гурехтанд", - гуфт Кабулов.
Вай таъкид кард, ки беш аз сеяки 400 шаҳристони Афғонистон таҳти назорати аъзои ҷунбиши радикалии Толибон* мебошанд.
Бо вуҷуди забти қаламравҳои ҷумҳурӣ, ҷангиён муяссар нашуданд, ки ба ягон маркази вилояти Афғонистон ворид шаванд.
"Бале, Толибон* метавонанд аз нуқтаи назари ҳарбӣ-техникӣ қодир бошанд шаҳрҳо рахна кунанд, аммо онҳо қудрати нигоҳ доштани онҳоро надоранд"- гуфт Кобулов.
Толибон* саъй намекунанд, ки 100% қаламрави Афғонистонро бо зӯр назорат кунанд, зеро онҳо мефаҳманд, ки ин ғайриимкон аст, гуфт коршинос.
Қаблан, намояндаи дафтари сиёсии Толибон* Абдуллоҳиб Мансур гуфта буд, ки онҳо қудратро дар аксари ҷумҳурӣ ба ғайр аз Кобул ва баъзе ноҳияҳои назди шаҳр ба даст овардаанд.
* - ҳаракати экстремистӣ, мамнӯъ дар Тоҷикистон ва Русия