ДУШАНБЕ, 13 июл - Sputnik. Як зани ҳудудан 60-сола дар Хуҷанд ба қаллобӣ муттаҳам мешавад, гузориш медиҳад Вазорати корҳои дохилаи Тоҷикистон.
Бино бар иттилои манбаъ, дар натиҷаи баргузор намудани чорабиниҳои оперативӣ-ҷустуҷӯӣ аз ҷониби кормандони милитсия зани 59-солаи сокини шаҳри Хуҷанд ҳамчун гумонбар дар содир намудани кирдори қаллобӣ дастгир карда шуд.
Номбурда, аз моҳи майи соли 2012 то моҳи январи соли 2014, якчанд маротиба бо роҳи фиреб ба боварии зани 47-солаи сокини шаҳри Бӯстон даромада, ӯро фиреб кардааст.
Ҳамин тавр, зан бо баҳонаи бо тиҷорат машғул шудан, аз охирон 19 ҳазор доллари амрикоиро гирифта, аз он 3 ҳазор 800 доллари амрикоиро дода, боқимонда 15 ҳазору 200 доллари амрикоиро то ҳол барнагардонидааст.
Нисбати гумонбаршаванда парвандаи ҷиноятӣ бо моддаи 247 қисми 4 Кодекси ҷиноятии Ҷумҳуҳурии Тоҷикистон оғоз карда шуда, тафтишот идома дорад.