ДУШАНБЕ, 13 июл — Sputnik. Давоми шаш моҳи соли равон дар Суғд ба маблағи 8 миллиарду 976 млн. сомонӣ маҳсулоти саноатӣ истеҳсол шудааст.
Ин рақам нисбат ба ҳамин давраи соли гузашта, бо назардошти индекси нархҳо 133,2 фоиз бештар аст, хабар медиҳад хадамоти матбуотии раиси вилояти Суғд.
Гуфта мешавад. ки дар ин давра таваҷҷуҳи асосӣ ба истеҳсоли маҳсулоти воридотивазкунанда ва ба содирот нигаронидашуда равона карда шуд.
Аз ҷумла, дар моҳҳои январ-июн ба миқдори 664,5 ҳазор тонна семент ва 722,5 ҳазор тонна ангишт истеҳсол карда шуда, суръати афзоиш мутаносибан 116,2 ва 103,8 фоизро ташкил намудааст.
Ҳамзамон, нисбат ба ҳамин давраи соли 2020 суръати афзоиши истеҳсоли ресмони пахтагин 140,6 фоиз ва газвори пахтагини тайёр 105,7 фоиз таъмин гардида, дар маҷмўъ, бо назардошти эҳтиёҷоти худӣ 2835,8 тонна калоба ва 3608,8 ҳазор метри мураббаъ газвори пахтагин истеҳсол карда шудаанд.
Истеҳсоли маҳсулоти хӯроквории ивазкунандаи воридот сол аз сол тавсеа ёфта, дар 6 моҳи соли 2021 ба миқдори 253,1 ҳазор тонна орд ва 1955,3 тонна равғани растанӣ истеҳсол шудааст.
Тибқи иттилои манбаъ, ба истиқболи 30-солагии Истиқлоли давлатӣ дар вилоят бунёди беш аз 300 корхонаву коргоҳи нави саноатӣ ба нақша гирифта шудааст.
Давоми 6 моҳи соли 2021 дар миқёси вилоят 61 корхонаву коргоҳҳои нав бо 475 ҷойи нави корӣ ба фаъолият шурўъ намуданд.
Тибқи нақша бошад, дар соли 2021 ба истифода додани 120 корхонаву коргоҳҳои нави саноатӣ бо 3027 ҷойи нави корӣ пешбинӣ гардидааст.