ДУШАНБЕ, 10 июл - Sputnik. Вазорати умури дохилии Тоҷикистон мегӯяд, 9-уми июли соли 2021, тахминан соати 13:20-дақиқа дар ноҳияи Деваштич садамаи маргбор рух додааст.
Ба иттилои манбаъ, ронандаи автомашинаи тамғаи "Киа-Оптима", Эралиев Абдусалом, сокини 47-солаи ҷамоати деҳоти Регари шаҳри Турсунзода, ҳангоми ҳаракат дар роҳи нақлиётгарди "Истаравшан - Деваштич" ба садама дучор шудааст.
Вазорат мегӯяд, Эралиев дар ҳудуди ноҳияи Деваштич, аз ӯҳдаи идораи воситаи нақлиёташ набаромада, ба канори чапи роҳ баромада, ба дарахт бархӯрдааст. Дар натиҷа мошин оташ гирифтааст.
"Дар натиҷа аз таъсири алангаи оташ қисми зиёди автомашина сӯхта, корношоям гардида, ронандаи автомашина Эралиев ва мусофираш зани 35-солаи сокини ҷамоати деҳоти Яхтани ноҳияи Деваштич ҷароҳати вазнини ҷисмонӣ бардошта, дар ҷойи ҳодиса ба ҳалокат мерасанд", - омадааст дар иттилоия.
Ба иттилои ВУД, мусофири дигари мошин хурдсол, Зарипова Суғдиёна Санҷаровна, соли таваллудаш 2015, сокини ҷамоати деҳоти Муҷуни ноҳияи мазкур, ҷароҳати ҷисмонӣ бардошта, дар беморхона бистарӣ гардидааст.
ВУД афзуд, ки феълан таҳқиқи ин ҳодиса идома дорад.