ДУШАНБЕ, 9 июл - Sputnik. Як марзбони қирғиз дар натиҷаи тирпарронӣ дар марзи Тоҷикистону Қирғизистон ба ҳалокат расид.
Дар ин бора хадамоти матбуоти Кумитаи давлатии амнияти миллии Қирғизистон хабар додааст.
"Сарбози Хадамоти сарҳадӣ, сержант Ҳуснидин Хозиев, соли таваллудаш 1994 кушта шуд. Ҳоло сабаби марги марзбон таҳқиқ карда мешавад", - гуфтанд дар Раёсат.
Манбаъ афзуда, ки аз ҷониби Тоҷикистон низ захмиён ва кушташудаҳо ҳастанд.
Ҳоло, дар қаламраве, ки як рӯз пеш тирпарронӣ рух дод, сардори раёсати хадамоти сарҳадии Кумитаи давлатии амнияти миллии Ҷумҳурии Қирғизистон дар Ботканд полковник Киялбек Толонбоев ва роҳбарони ниҳодҳои амниятӣ ҳузур доранд.
Низомиёни ҳарду ҷониб ба таҳқиқи сабабҳои ҳодиса идома медиҳанд.
Ёдовар мешавем, ки тирпарронӣ дар марзи Тоҷикистону Қирғизистон рӯзи 8 июл рух дод.
Тибқи иттилои Кумитаи давлатии амнияти миллии Тоҷикистон, чор шаҳрванди Қирғизистон марзи давлатро ғайриқонунӣ убур кардаанд.
Ҳодиса дар ҷамоати Росровути ноҳияи Деваштичи вилояти Суғд рух додааст.
Артиши Қирғизистон бо автоматҳои Калашников мусаллаҳ будаанд.
Ҷониби Тоҷикистон қайд кард, ки онҳо ният доштанд аз минтақаи Деваштич ба қаламрави ҷумҳурии худ 9 асп интиқол диҳанд.
Сарҳадбонони Қирғизистон бар хилофи фармони охирин барои убури сарҳади давлатӣ, ба сӯи марзбонони тоҷик оташ кушоданд. Дар оташи ҷавобӣ, ду марзбони қирғиз маҷрӯҳ шуданд.
Дар навбати худ, Кумитаи давлатии амнияти миллии Қирғизистон қайд кард, ки марзбонон дар минтақаи ағбаи Наумини ноҳияи Лайлаки вилояти Ботканд хидмат мекарданд ва дар масири муайян ҳаракат доштанд.
Қирғизистон мегӯяд, аввал низомиёни тоҷик оташ кушоданд.