ДУШАНБЕ, 4 июл — Sputnik. Дар вилоятҳои Самарқанду Тошканд ва чанде дигар ваксинзании ихтиёрӣ алайҳи коронавирус барои шаҳрвандони аз 18 - сола боло оғоз ёфтааст.
Бино бар маълумоти Sputnik Ӯзбекистон, Комиссияи махсуси ҷумҳуриявӣ рӯйхати шаҳрвандоне, ки бояд эм гиранд, васеъ намудааст.
Ҳамакнун, донишҷӯёни аз 18 - сола боло, ки дар донишгоҳҳои давлативу ғайридавлатӣ ва ҳамчунин аз рӯи барномаҳои бакалаврӣ ва баъдидипломӣ таҳсил мекунанд, метавонанд алайҳи маризии коронавирус худро бо роҳи ваксингирӣ эмин намоянд.
Манбаъ меафзояд, барои донишҷӯёне, ки ихтиёран ваксин мегиранд, имтиёзҳо низ маҷвуд аст:
Аз ҷумла донишҷӯёни шартномавӣ, ки ихтиёран алайҳи коронавирус ваксин мегиранд, ҳангоми пардохти шартнома барои соли хониши 2021/2022 тахфифи яквақтаи 10% мегиранд.
Дар Тоҷикистон низ ваксингирии ҳатмӣ аз афроди 18 - сола боло оғоз ёфт. Вале феълан чунин сабукиҳо барои донишҷӯёне, ки тариқи шартнома таҳсил мекунанд, эълон нагардидааст.