ДУШАНБЕ, 1 июл - Sputnik. Рустами Эмомалӣ, раиси Маҷлиси миллии Маҷлиси Олии Тоҷикистон дар мулоқот бо раиси Думаи давлатии Маҷлиси Русия Вячеслав Валодин пешниҳод кард, ки шумораи парвозҳо бештар карда шаванд.
Тавре дафтари матбуоти Маҷлиси миллии Тоҷикистон тавзеҳ медиҳад, дар мулоқоте, ки имрӯз Рустами Эмомалӣ ва Вячеслав Володин дар ҳошияи ҷаласаи навбатии Шӯрои Ассамблеяи Парламентии Созмони Аҳдномаи амнияти дастаҷамъӣ анҷом доданд, мавзӯи парвозҳо ва муҳоҷирон калидӣ буд.
"Ҷониби Тоҷикистон пешниҳод намуд, ки дар ин самт тадбирҳои мақсаднок, аз ҷумла барқарорсозии парвозҳои мунтазам ва рафтуомади бемонеаи шаҳрвандон, таҳия ва амалӣ гарданд", - афзудааст манбаъ.
Гуфта мешавад, Рустами Эмомалӣ таваҷҷуҳи ҳамтои худро ба тавсеаи ҳамкории тиҷоративу иқтисодӣ, ҷалби сармояи русӣ ба иқтисоди Тоҷикистон, мавҷудияти захира ва иқтидори васеъ барои афзоиш додани ҳаҷми савдои мутақобила, ҷалб намуд.
Мулоқоти Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ ва Раиси Думаи Давлатии Маҷлиси Русия Вячеслав Викторович Володин
© Дафтари матбуоти Маҷлиси миллии Тоҷикистон
"Роҳандозӣ намудани истеҳсолоти муштараки маҳсулоти саноатӣ бо истифода аз технологияҳои русӣ ва коркарди ашёи хоми маҳаллӣ, ичунин содироти минбаъдаи он ба бозорҳои Русия, таъкид гардид", - афзудааст дафтари матбуотӣ.
Рустами Эмомалӣ ҷиҳати расонидани кумакҳои башардӯстонаи тиббӣ, аз ҷумла барои ташхиси бемории COVID-19 изҳори миннатдорӣ кардааст.
Маориф, амният ва вазъи феълӣ дар Афғонистон аз мавзӯъҳои дигари мулоқоти ҷонибҳои Тоҷикистон ва Русия буданд.