ДУШАНБЕ, 29 июн — Sputnik. Бино бар иттилои дафтари матбуоти Бонки миллии Тоҷикистон, ахиран агентии байналмилалии рейтингии Moody's Investors Service (Moody's) бори нахуст аз соли 2018 дурнамои рейтинги байналмилалии қарзии Тоҷикистонро аз дараҷаи (ҳолати) “манфӣ” ба дараҷаи “устувор” тағйир дод.
“Агентии Moody's ба Тоҷикистон рейтинги қарзии “B3”-ро бо дурнамои “устувор” сазовор донист”, - таъкид доштааст манбаъ.
БМТ қайд кардааст, ки барои тағйир додани дурнамои рейтинг аз дараҷаи “манфӣ” ба “устувор” пешравии Тоҷикистон дар самти устувор намудани мавқеаш аз рӯи пардохтҳои беруна тайи соли охир ба шумор меравад, ки ин ба андозаи назаррас зиёд шудани захираҳои асъориро дар натиҷаи афзудани самаранокии идорасозии захираҳои байналмилалӣ бозгӯ менамояд.
Ҳамзамон дар натиҷа эҳтимолияти фишори зиёди хавфҳои берунии афзоянда ба профили қарзии Тоҷикистон низ камтар гардид.
Гуфта шудааст, ки Агентии Moody's бар он аст, ки ҳаҷми ин захираҳо дар сатҳи ҷорӣ боқӣ монда, барои саривақт иҷро намудани уҳдадориҳои дарпешистода аз рӯи пардохтҳои беруна кофӣ мебошад.
“Вобаста ба ин устувории кишвар дар баробари аксар фишорҳои беруна ва инчунин пардохтпазирии Ҷумҳурии Тоҷикистон дар сатҳи баланд боқӣ хоҳад монд”, - зикр намудааст БМТ.
Ҳамчунин аз ҷониби Бонки миллӣ таъкид шудааст, ки пандемияи коронавирус ҳамкории мутақобили Тоҷикистонро бо шарикони рушд суръат бахшида, ба такмили минбаъдаи асосҳои сиёсӣ ва ангезаи ислоҳот дар кишвар мусоидат хоҳад кард.