ДУШАНБЕ, 17 июн — Sputnik. Бино бар иттилои дафтари матбуоти “Амонатбонк” ахиран тариқи видеоконфронс вохӯрии дуҷонибаи Раиси Раёсати БДА ҶТ “Амонатбонк” Икромӣ Сироҷиддин бо роҳбари миссияи Хазинаи байналмилалии асъор дар Тоҷикистон Селим Электаг баргузор гардид.
Манбаъ таъкид доштааст, ки зимни мулоқот ҷонибҳо масоили васеи ҳамкориҳои дуҷониба, аз ҷумла бизнес модели Бонк, сарчашмаҳои даромад, хароҷотҳо барои маблаѓгузорӣ ва иҷро намудани ўҳдадориҳо дар назди пасандозгузорон, масъалаҳои сармоягузорӣ ва қарздиҳиро баррасӣ карданд.
Ҳамзамон қайд карда шудааст, ки дар рафти мулоқот Икромӣ Сироҷиддин қайд кардаааст, ки ҳолати молиявии Амонатбонк дар сатҳи хуб ва устувор қарор дошта Амонатбонк ҷиҳати рушди бизнеси бонкӣ ва роҳандозӣ намудани сиёсати иҷтимоии давлат ҳамаи тадбирҳои заруриро андешида истодааст.
Зикр шудааст, дар оянда ҷонибҳо барои рушди минбаъдаи ҳамкориҳо омодагии худро изҳор намуданд.