ДУШАНБЕ, 10 июн - Sputnik. Президенти Тоҷикистон Эмомалӣ Раҳмон ва раҳбари Ӯзбекистон Шавкат Мирзиёев масоили тағирёбии иқлим ва гармшавии кураи заминро баррасӣ карданд.
Эмомалӣ Раҳмон қайд кард, ки обшавии босуръати пиряхҳо ва афзоиши истеъмоли об аз ҳисоби афзоиши аҳолӣ ва рушди иқтисодиёт метавонад ба оқибатҳои манфӣ оварда расонад.
Президентҳо вазъи захираҳои обӣ ва энергетикӣ дар Осиёи Марказиро алоҳида арзёбӣ карданд. Тоҷикистон ва Ӯзбекистон ҷонибдори истифодаи ҳамаҷонибаи судманди захираҳо шуданд.
Ғайр аз ин, Мирзиёев ташаббуси президенти Тоҷикистон дар бораи соли байналмилалии ҳифзи пиряхҳо эълон кардани соли 2025 ва таъсиси Фонди махсуси байналмилалии ҳифзи пиряхҳоро дастгирӣ кард.
Онҳо инчунин дар бораи наҷоти баҳри Арал сӯҳбат карданд.
Раҳмон бо ташаббуси Ӯзбекистон қабули қатъномаи Маҷмаи Умумии СММ дар бораи минтақаи инноватсияҳо ва технологияҳои экологӣ эълон кардани минтақаи Аралро истиқбол кард.
Мирзиёев ва Раҳмон изҳори умедворӣ карданд, ки Маркази байналмилалии инноватсионии баҳри Арал дар назди президенти Ӯзбекистон ва Фонди бисёрҷонибаи эътимоди амнияти башарӣ дар минтақаи Арал таҳти сарпарастии СММ метавонанд дар беҳбуди вазъи Арал саҳм бигирад.