ДУШАНБЕ, 10 июн — Sputnik. Шавкат Мирзиёев, раисҷумҳури Ӯзбекистон дар доираи сафари расмӣ ба Тоҷикистон ба майдони “Дӯстӣ”-и шаҳри Душанбе омад ва бар пояи муҷассамаи асосгузори давлатии тоҷикон Исмоили Сомонӣ гулчанбар гузошт.
Тибқи иттилои дафтари матбуоти раисҷумҳури Тоҷикистон, дар ин маросим Президенти Ӯзбекистонро сарвазири Тоҷикистон Қоҳир Расулзода ва дигар шахсони расмӣ ҳамроҳӣ намуданд.
Ҳамзамон манбаъ қайд кардааст, ки имрӯз пас аз гуфтугӯҳои расмӣ Эмомалӣ Раҳмон, раисҷумҳури Тоҷикистон ва Шавкат Мирзиёев, президенти Ӯзбекистон бо мақсади шиносоӣ бо имкониятҳои рушди соҳаи сайёҳӣ ба бӯстонсаройи беруназшаҳрӣ, воқеъ дар ноҳияи Варзоб рафтанд.
“Дар қароргоҳи беруназшаҳрӣ Сарони ду кишвар табиати зебову нотакрор ва обҳои мусаффои шаршараҳоро тамошо карданд. Ҳадаф аз баргузор кардани сайругашти шомгоҳӣ — муаррифии мавзеъҳои зебову нотакрори кишвари биҳиштосоямон мебошад”, - таъкид доштааст манбаъ
Дафтари матбуоти раисҷумҳур зикр кардааст, ки Эмомалӣ Раҳмон бо анъанаҳои олии меҳмоннавозии тоҷикона маҳбубияти хоса дошта, ҳар як меҳмони Тоҷикистонро самимона пазироӣ мекунад.
Сафари расмии Президенти Ӯзбекистон дар Тоҷикистон идома дорад.