ДУШАНБЕ, 25 май - Sputnik. Низоъ дар марзи Қирғизистон ва Тоҷикистон на танҳо дар сатҳи дуҷониба, балки тавассути музокироти раҳбарони ҳамаи кишварҳои минтақа ҳал шуд, гуфт намояндаи махсуси ИА дар Осиёи Марказӣ Питер Буриан.
"Ман ба ин хушбинона менигарам. Зеро равандҳое, ки қаблан натиҷа надоданд, ҳоло сар заданд. Роҳбарони минтақа хеле зуд бо ҷонибҳои муноқиша тамос гирифтанд. Онҳо ҳалли мусолиматомезро ҷонибдорӣ карданд, розӣ шуданд, ки ҳаргуна ҷангҳоро зуд қатъ кунанд", - гуфт Буриан.
Намояндаи махсуси ИА қайд кард, ки муноқиша дар марзи Қирғизистон ва Тоҷикистон на танҳо зарурати делимитатсия ва демаркатсиякунии сарҳадҳоро дар кишварҳои Осиёи Марказӣ, балки ҳалли масъалаҳои истифодаи муштараки захираҳои об ва рушди савдои ҳуқуқии минтақаро дарбар дошт.
Ӯ гуфт, ин муноқишаҳо ҳушдорест, ки зуд бояд ҳалли худро пайдо кунанд. Ба таъкиди Буриан, Иттиҳоди Аврупо омода аст, ки ёрии техникӣ расонад.
Ҳамчунин сиёсатмадор зикр намуд, ки барои ИА устувории ин минтақа хеле муҳим аст.
Танишу созиш дар марзи Тоҷикистону Қирғизистон
Вазъ дар марзи Тоҷикистону Қирғизистон 28 апрел дар пайи як баҳс сари дарғоти “Головной” шиддат гирифта, 29 апрел ба даргирии мусаллаҳона миёни низомиёни ду кишвар печид.
Теъдоди қурбониён аз ҳар ду тараф беш аз 55 нафарро ташкил медиҳад.Мақомоти Тоҷикистон гуфтанд, ки дар пайи муноқишаи мусаллаҳонаи марзӣ 87 тан захмӣ шуда, 19 нафар ба ҳалокат расидаанд. Қирғизистон аз ҳалокати 36 шаҳрвандаш дар ин даргирӣ хабар дод.
Тибқи иттилои Кумитаи давлатии амнияти миллии Тоҷикистон, муттаҳамони қазия шаҳрвандони Қирғизистон будаанд, ки ба сӯи тоҷиконе, ки мехостанд дар он ҷой камераҳои назоратӣ насб кунанд, санг андохтанд ва ҳатто дар ин муноқиша низомиён дар либоси мулкӣ истифода шуданд.
Бишкек дар навбати худ гуфт, ки шаҳрвандони Тоҷикистон муноқишаро ба роҳ монданд, ба сӯи ҳамсояҳояшон аз силоҳ оташ кушоданд.Феълан вазъ дар марз муътадил арзёбӣ гардида, 2 май ҳайатҳои Тоҷикистон ва Қирғизистон протоколи муштарак дар бораи делимитатсия ва демаркатсияи сарҳадро ба имзо расонданд.
Тоҷикистону Қирғизистон ҳудуди 970 километр марзи муштарак доранд, ки аз ин то ҳол ҳудуди 520 километраш аломатгузорӣ шуда, боқимонда ҳанӯз ҳам номуайян мебошад.