ДУШАНБЕ, 24 май - Sputnik. Ягон пойгоҳи низомии ИМА дар Тоҷикистон мустақар карда намешавад. Замир Кабулов, фиристодаи махсуси президенти Федератсияи Русия оид ба Афғонистон дар ин бора дар сӯҳбат бо "Известия" гуфтааст.
Ба гуфтаи ӯ, Ӯзбекистон инчунин қаламравҳои худро ба сарбозони амрикоӣ нахоҳад дод.
"Тамосҳои мо бо шарикони тоҷику ӯзбек нишон медиҳанд, ки ҳеҷ муроҷиати расмӣ ба онҳо (аз Иёлоти Муттаҳида дар бораи таъсиси пойгоҳҳои низомӣ дар ҷумҳуриҳо) вуҷуд надорад", - таъкид кард Кабулов.
Вай қайд кард, ки Тоҷикистон ва Ӯзбекистон қаблан рӯшан гуфта буданд, ки чунин тадбир ғайриимкон аст.
"Аз ин рӯ, мо набояд ба ин махсусан муқобилият кунем", - гуфт Кобулов.
Намояндаи махсус дар Афғонистон илова кард, ки кишварҳо ва дигар шахсони манфиатдор ба ин масъала "набояд дар ин бора хавотир шаванд."
Кабулов ёдовар шуд, ки Тоҷикистон узви СПАД аст ва чунин қарорҳо бояд аз ҷониби созмон тасдиқ карда шаванд.
Дар навбати худ, Ӯзбекистон қонуне қабул кард, ки таъсиси пойгоҳҳои низомии хориҷиро дар қаламрави ҷумҳурӣ манъ мекунад.
Қаблан рӯзномаи амрикоии Wall Street Journal навишта буд, ки пас аз хуруҷ аз Афғонистон ИМА метавонад нерӯҳояшро дар кишварҳои Осиёи Марказӣ мустақар кунад, дар ҳоле ки ҳанӯз созишномаҳо вуҷуд надоранд.
Ба гуфтаи баъзе аз кормандони низомӣ ва намояндагони маъмурияти президент, Ҷо Байден, роҳи беҳтарин мустақар кардани нерӯҳо дар Ӯзбекистон ва Тоҷикистон хоҳад буд, ки бо Афғонистон марзи муштарак доранд.
Ин имкон медиҳад, ки дар ҳолати зарурӣ зуд ба кишвар ворид шуд.
Аммо манбаҳо гуфтанд, ки бо назардошти "ҳузури бузурги низомии" Русия ва афзоиши нуфузи Чин, таъсиси пойгоҳҳо дар ин ҷумҳуриҳо душвор аст.