ДУШАНБЕ, 19 май - Sputnik. Вазирони корҳои хориҷӣ иҷрои созишномаҳои ҳамкорӣ дар соҳаҳои низомӣ ва ҳарбӣ-техникиро баррасӣ карданд, гуфт вазири корҳои хориҷии Русия Сергей Лавров дар як нишасти матбуотӣ.
"Мо кумаки Федератсияи Русияро дар мусоидат барои навсозии қувваҳои мусаллаҳи Тоҷикистон муҳокима кардем, розӣ шудем, ки минбаъд низ нақшаҳои пешбинишударо пурра иҷро кунем", - гуфт роҳбари Вазорати корҳои хориҷии Русия.
Лавров қайд кард, ки ин бо назардошти он ки таҳдидҳо ба амнияти умумӣ, пеш аз ҳама, дар шароити вазъият дар Афғонистон дар партави эълони хуруҷи нерӯҳои ИМА ва НАТО боқӣ мондаанд, муҳим аст.
"Мо аз фаъол шудани ҷангиёни созмонҳои байналмилалии террористӣ дар вилоятҳои шимолии Афғонистон нигарон ҳастем, омодаем ва дар амал татбиқ хоҳем кард - ба Душанбе дар мубориза бо терроризм, экстремизм ва гардиши ғайриқонуии маводи мухаддир ҳама кӯмакҳои заруриро расонем", - гуфт вазири корҳои хориҷии Русия.
Мавзӯи амният дар минтақа ба яке аз мавзӯъҳои мавриди баррасӣ дар мулоқоти вазирон табдил ёфт: онҳо инчунин масоили машқҳои муштарак ва бунёди посгоҳ дар марзи Афғонистонро баррасӣ карданд.
Илова бар масъалаҳои амниятӣ, Сергей Лавров ва Сироҷиддин Муҳриддин масъалаҳои тандурустӣ, робитаи ҳавоӣ, иқтисод ва сиёсатро низ баррасӣ карданд.
Ёдовар мешавем, ки вазири корҳои хориҷии Русия Сергей Лавров бо сафари расмӣ дар Душанбе қарор дорад. Вай дар Шӯрои вазирони корҳои хориҷии СПАД иштирок мекунад.