ДУШАНБЕ, 17 май – Sputnik. Ин гурӯҳи мусофирон барои сафар ба шаҳри Иркутски Русия аз ширкатҳои ҳавонавардии “Икар” ва “Азур эйр” барои рӯзи 16 май чипта харидаанд, аммо парвози онҳо сурат нагирифтааст.
Як масъули Фурудгоҳи байналмиллалии Хуҷанд дар суҳбат ба Sputnik Тоҷикистон сабаби парвоз накардани ҳавопаймоҳо ба самти Иркутскро шарҳ дод.
“Пеш аз он, ки ҳавопаймо омада ба Иркутск равад, масъулони ширкатҳо бояд ҳуҷҷатҳои техникии ҳавопаймоҳоро ба унвонии Агентии авиатсияи граждании кишвар пешниҳод намуда, иҷозат мегирифтанд. Инҳо танҳо билет фурӯхта, то рӯзи парвоз иҷозатномаро ба даст оварда натавонистаанд. Чизи дигар ин аст, ки мардуми зиёд дар ин хатсайр билет харидаанд ва барои бурдани онҳо бояд ҳавопаймои бузургтар зарурат шудааст”, - гуфт манбаъ аз Фурудгоҳи Хуҷанд.
Бино ба иттилоъи манбаъ, ҳавопаймои ширкати “Икар” соати 13: 30 ва ҳавопаймои “Азур эйр” бояд соати 21:30 рӯзи 16 май ба самти Хуҷанд-Иркутс парвози чартерӣ анҷом медод, ки парвози онҳо сурат нагирифтааст.
Зимнан садҳо сокинон, ки аз навоҳии дурдаст барои рафтан ба муҳоҷирати Русия омада буданд, бо сабаби чунин иттифоқот, ду рӯз бо шабро дар саҳни Фурудгоҳи Хуҷанд сипарӣ мекунанд. Яке аз ин мусофирон Одил Каримов сокини ноҳияи Ашт аст.
Ӯ дар суҳабт ба Sputnik Тоҷикистон гуфт, ки ин ҳолро интизор надоштанд.
“Омадем, дар Фурудгоҳ гуфтанд, ки ҳоло ҳавопаймое, ки шумо бояд ба Иркутс парвоз кунед, наомадааст. Ду соат интизор шудем, чор соат интизор шудем, ҳоло беш аз ду рӯз аст, ки мунтазири парвоз ҳастем”, гуфт ӯ.
Масъулони Фурудгоҳи байналмиллалии Хуҷанд мегуянд, ки ба таъхир гузоштани парвози ҳавопаймо аз онҳо вобастагӣ надорад, балки ин коре, ки бояд миёни ширкати ҳавопаймоӣ ва Агентии авиатсияи гражданӣ матраҳ карда шавад.
Бино ба иттилоъи дарёфтӣ парвози ин гурӯҳи мусофирон то рӯзи 18 май ба таъхир гузошта шудааст.