Дар доираи чорабиниҳои Рӯзи ҷавонон ва бо мақсади тарғиби тарзи ҳаёти солим дар тамоми шаҳру ноҳияҳои вилояти Суғд Дави миллӣ доир шуд.
Котиботи раиси Суғд мегӯяд, аз ҷумла, дар шаҳри Хуҷанд беш аз 12 ҳазор сокинони касбу кори гуногуни маркази вилояти Суғд дар чорабинии варзишӣ ширкат варзиданд.
Раҷаббой Аҳмадзода, раиси Суғд, қабл аз оғози Дави миллӣ изҳор доштааст, ки баргузор намудани чунин чорабиниҳои варзишӣ ба ҷисму рӯҳи инсон нерӯи нав мебахшад.
Дар дави миллӣ намояндагони касбу кори гуногун бо овезаҳо баромаданд.
Раиси вилояти Суғд ва роҳбарони як қатор идораву ташкилотҳои вилоятиву шаҳрӣ ва сокинони касбу кори гуногун дар ин маъракаи варзишӣ фаъолона иштирок намуданд.
Мақсад аз баргузории ин рӯз таҳкими тарзи ҳаёти солим, рушду инкишофи соҳаи варзиш ва оммавияти он байни аҳолӣ дар саросари мамлакат мебошад, афзуд раиси Суғд.
Дави миллӣ дар Хуҷанд аз хиёбони Раҳим Ҷалил оғоз гардид
Иштирокчиён ба воситаи кӯчаи Султон Умаров, купрӯки нав ва хиёбони Раҳмон Набиев зӯрозмоиро давом додаанд
Нуқтаи ниҳоии дави миллӣ майдони назди Парчами миллӣ дар шаҳри Хуҷанд будааст.
Дар анҷоми мусобиқа ғолибон бо диплом ва туҳфаҳои хотиравӣ қадршиносӣ гардиданд.
Аз ҷумла ба бархе аз иштирокдорон қолинҳо туҳфа шуданд
Дави миллӣ дар Тоҷикистон бар асоси фармони раисиҷумҳур аз соли 2007 инҷониб ҳамасола якшанбеи сеюми моҳи май баргузор мегардад.