ДУШАНБЕ, 16 май — Sputnik. Гурӯҳи террористии ДОИШ (мамнӯъ дар Тоҷикистон ва Русия) масъулияти ҳамлаи рӯзи ҷумъа ба масҷиди Кобулро бар уҳда гирифт
Дар паи инфиҷоре дар масҷиди шаҳристони Шакардараи вилояти Кобул 12 нафар, аз ҷумла имоми ҷамоат шаҳид ва беш аз 15 тани дигар захмӣ шуданд .
Ба гуфтаи полиси Кобул ин инфиҷор зуҳри ҷумъа дар ҳангоми барпоии намози ҷумъа дар масҷиди Ҳоҷӣ Бахшӣ дар минтақаи Қалъаи Муродбеки шаҳристони Шакардара рух додааст .
Пеш аз ин гурӯҳи Толибон дахолати худро дар ин ҳамла рад карда буд.
Пештар хабар дода шуд, ки бар асари таркиши автобус дар вилояти Парвон дар шарқи Афғонистон ҳаддиақал ду ғайринизомӣ кушта ва нӯҳ нафари дигар маҷрӯҳ шуданд.
Дар ин бора расонаҳо дар истинод ба Вазорати корҳои дохилии Афғонистон хабар медиҳанд.
Бино ба иттилои манбаъ, ин ҳодиса дар минтақаи Ҷабал Сараҷ рух додааст. Дар бораи вазъи захмиён маълумоте ироа нашудааст.
Инчунин, дар канори шаҳри Фараҳ, маркази маъмурии вилояти ҳамном автомашинаи бомбагузошташуда таркид. Ду сарбози артиши Афғонистон ҳалок ва панҷ нафари дигар маҷрӯҳ шуданд.
Тибқи иттилои ин шабака, таркиш дар пойгоҳ рух додааст. То ҳол дар бораи вазъи сарбозони маҷрӯҳ маълумоте нест.
Пештар хабар дода шуд, ки дар вилояти Зобул дар ҷануби Афғонистон 16 нафар кушта ва 41 тани дигар маҷрӯҳ шуданд.