ДУШАНБЕ, 9 май — Sputnik. Ба деҳаҳое, ки аснои таниши марзӣ хароб шуда, аксар деҳнишинон алъон бидуни манзили зист мондаанд, тамоми масолеҳи сохтмонӣ интиқол дода шуд.
Бар хабари котиботи раиси вилояти Суғд, рӯзи гузашта Раҷаббой Аҳмадзода барои шинос шудан ба рафти корҳои сохтмонӣ ба деҳаҳи Хоҷаи Аъло ва Сомониён сафар кард.
Аҳмадзода ба сокинони ин де деҳа ваъда дод, ки дар муддати як моҳ онҳо соҳиби манзилҳои нав мегарданд.
Раиси вилоят аз оилаҳои зарардида боздид намуда, ба онҳо либосу пойафзол тақсим кард.
Гуфта мешавад, ҳоло мардуми шаҳру деҳоти Исфара якдилона ба ҳашар баромада, маҳалли бунёди хонаҳои навро тоза карда истодаанд.
Ба сокиноне, ки дар муноқишаи ахири марзӣ ҷабри зиёд диданд, ҳам азх номи роҳбари давлат ва ҳамчунин аз номи соҳибкорону ашхоси саховаманд кумакҳои мунтазами моддӣ дастрас гардида истодааст.
Ёдовар мешавем, ки ҳукумати шаҳри Исфара аз хароб шудани беш аз 55 хона дар муноқиаи ахири марзӣ бо Қирғизистон хабар дода буд.
Аз ҷумла 15 хона дар Ҷамоати деҳоти Ворух, 6 хона дар ҷамоати деҳоти Сурх, аз Ҷамоати деҳоти Шаҳрак 5 адад ва аз Ҷамоати деҳоти Чоркӯҳ бошад 29 хона пурра ва ё қисман хароб шудаанд.