ДУШАНБЕ, 7 май - Sputnik. Дар доираи эълон гардидани “Душанбе – пойтахти фарҳангии ИДМ” ва ба муносибати Рӯзи байналмилалии осорхонаҳо, 18 майи соли 2021 Осорхонаи миллии Тоҷикистон бори ҳаштум чорабинии байналмилалии “Шабе дар осорхона” - ро мегузаронад.
Чорабинӣ фарогири сӣ маҳфили рангоранги фарҳангӣ буда, иштироки тамошогарон дар ҳамаи онҳо ройгон аст.
Сарпарасти кулли чорабинӣ Осорхонаи миллӣ, ширкатҳои “Сиёма” ва “МегаФон Тоҷикистон” мебошанд.
Бояд гуфт, ки барномаи фарҳангию фароғатии "Шабе дар осорхона" яке аз иқдомҳои байналмилали осорхонаҳои ҷаҳон буда, он бори аввал дар Тоҷикистон пас аз ба истифода додани Осорхонаи миллии Тоҷикистон соли 2013 доир шуда буд.
Ёдовар мешавем, ки ҳамасола 18 май Рӯзи байналмилали осорхонаҳо (International Museum Day) ҷашн гирифта мешавад ва аз соли 1978 инҷониб 150 давлати ҷаҳон ин рӯзро таҷлил менамоянд.