ДУШАНБЕ, 29 апр — Sputnik. Бино ба иттилоъи манобеъ аз шаҳри Исфара дар пайи муноқишаи ахири марзӣ, ки аз дирӯз сари тақсими об шурӯъ шуд, ҳоло дар се ҷамоати шаҳри Исфара, ки ҳамсарҳад бо Қирғизистон аст, садои тирпарронӣ шунида мешавад.
“Муноқиша дар Хоҷаи Аъло, Сомониён, деҳаи Лангари деҳаи Чорқишлоқи ҷамоатҳои Сурх, Чоркӯҳ ва Ворух идома дорад”, - гуфт манбаъи Sputnik Тоҷикистон.
Сокинон мегӯянд, ҳоло сарҳадбонони қирғиз дар роҳи миёни Чоркӯҳ – Хоҷаи Аъло бо силоҳ истода, барои рафтани сокинон ба сари обанбор иҷоза намедиҳанд.
Як манбаъ аз Бемористони марказии шаҳри Исфара гуфт, дар пайи тирпаррони ахир ҳудуди 15 нафар захмин шуда, ба бемористон интиқол дода шудаанд.
Барои ба эътидол овардани вазъ мақомоти баландмақоми ниҳодҳои қудратӣ ба ҷойи ҳодиса сафар кардаанд.