ДУШАНБЕ, 27 апр — Sputnik. Эмомалӣ Раҳмон, раисиҷумҳури Тоҷикистон, бо имзои қарори Ҳукумат Мирзо Хуршед Файзуллозодаро муовини якуми раиси Кумитаи давлатии сармоягузорӣ ва идораи амволи давлатии Тоҷикистон таъйин намуд.
Хуршед Мирзо дар баробари кораш дар мақоми ноиби аввали Рустами Эмомалӣ, президенти ФФТ инчунин дар мақоми мудири кулли корхонаи давлатии “Тоҷинвест”-и Кумитаи давлатии сармоягузорӣ ва идораи амволи давлатӣ кор мекард. То таъйинаш ба ин мақом ӯ дар вазифаи директори Муассисаи давлатии телевизиони “Варзиш” фаъолият дошт.
Дар баробарои Хуршед Мирзо инчунин Зуҳурзода Саид Холаҳмад муовини раиси Кумитаи давлатии сармоягузорӣ ва идораи амволи давлатии Тоҷикистон таъйин гардид.
Аҳмадзода Орзу Ҳусейн бо сабаби ба кори дигар гузаштан аз вазифаи муовини раиси Кумитаи давлатии сармоягузорӣ ва идораи амволи давлатӣ ва Шерализода Шараф Аҳмадҷон низ бо сабаби ба кори дигар гузаштан аз вазифаи муовини якуми раиси ин Кумита озод карда шуданд. Шерализода мақоми муовини вазири корҳои хориҷии Тоҷикистонро гирифт.