ДУШАНБЕ, 13 апрел - Sputnik. Агентии зидди фасоди Тоҷикистон аз боздошти ду масъули моддии неругоҳи барқии обии "Норак" хабар медиҳад, ки дар тасарруфи музди меҳнати кормандон гумонбар дониста мешаванд.
Ба иттилои манбаъ, тафтиши фаъолияти молиявии хоҷагии ин неругоҳ бо фармоиши роҳбари Ожонсии зидди фасод, моҳи январи соли ҷорӣ сурат гирифт.
Дар рафти тафтишот муайян гардид, ки шахсони маъули ин бахш, аз ҷумла О.В. ва Л. И. бо воситаи 38 корти пластикӣ, музди меҳнати кормандонро ба маблағи 2 миллиону 383 ҳазор сомонӣ тасаруф намудаанд.
Манбаъ меафзояд, аз маблағи зарари ошкоркардашуда дар рафти санҷиш 1 миллиону 818,5 ҳазор сомонӣ барқарор карда шуд.
Ба ҳамин минвол, нисбати О.В. ва Л.И. бо моддаи 245 қисми 4 банди "б" ва моддаи 323 Кодекси ҷиноятии Ҷумҳурии Тоҷикистон парвандаи ҷиноӣ оғоз гардида, тафтишот идома дорад.
Феълан, назари ҷониби боздоштшудаҳо ва ҳимояткунандаҳои онҳо дар робита ба қазияи тасарруфи маоши кормандони неругоҳи мазкур, рӯи даст нест.