ДУШАНБЕ, 12 апр — Sputnik. Тибқи иттилои Кумитаи олимпӣ, бозиҳои даври дуюми Чемпионати Тоҷикистон рӯзҳои 10-11 апрел баргузор шуданд.
Дар қаҳрамонӣ дастаи нави лигаи олӣ – “Эсхата”-и Хуҷанд аввалин пирӯзиашро дар лигаи олӣ ҷашн гирифт.
Тими “Эсхата” дар сафар тими КМВА-и Душанберо бо ҳисоби 3:1 мағлуб намуд. Ҳар се голро дар ҳайати “Эсхата” легионерҳои ӯзбекистонӣ заданд, - омадааст дар иттилоия.
Голзанҳои тими бонк, легионерҳои ӯзбекистонӣ – Акобир Тураев ду гол, Шаҳзод Абдураҳимов як гол задааст.
Бозии дигар миёни дастаҳои “Хатлон” ва “Хуҷанд” баргузор шудааст, ки мусовӣ – 1:1 анҷоё ёфтааст. Ба голи задаи Нуриддин Ҳамроқулов хуҷандиҳо тавассути зарбаи нишонраси Артем Сердюк ҷавоб доданд, таъкид кардааст Кумитаи олимпӣ.
Тими “Куктош” дар майдони худ бар дастаи “Истаравшан” бо ҳисоби 1:0 пирӯз гардид. Голи ягонаро дар ин вохурӣ Азизбек Султонов ба ҳадаф расондааст.
Дар бозӣ миёни дастаҳои “Равшан” ва “Файзканд” ғолиб муайян нагардид ва ҳисоб 0:0 боқӣ монд.
Кумита зикр намудааст, ки бозиҳои дастаи “Истиқлол” дар лигаи олӣ, бо сабаби иштироки ин даста дар марҳилаи гурӯҳии лигаи чемпионҳои Осиё дар вақти дигар баргузор мешаванд.
Бозиҳои даври навбатии Чемпионати Тоҷикистон рӯзҳои 16, 17, 18 апрел баргузор хоҳанд шуд.