ДУШАНБЕ, 7 апр - Sputnik. Мақомоти авиатсионии Тоҷикистон ва Афғонистон Созишнома дар бораи тартиби кори байни марказҳои хизматрасонии ҳаракати ҳавоии Душанбе — Ҷумҳурии Тоҷикистон ва Кобул — Ҷумҳурии Исломии Афғонистонро ба имзо расонданд, иттилоъ додааст АМИТ “Ховар”дар истинод ба Агентии авиатсияи граждании Тоҷикистон.
Иттилоъ дода шудааст, ки санади мазкурро дар Душанбе Директори Агентии авиатсияи граждании Тоҷикистон Икром Субҳонзода ва Сардори Раёсати авиатсияи граждании Афғонистон Қосим Вафозода ба имзо расонданд.
Тибқи иттилои манбаъ, созишномаи мазкур барои ба роҳ мондани ҳамкорӣ дар соҳаи мубодилаи маълумот дар самти амалишавӣ ва танзим, ҳамоҳангсозӣ ва истифодаи фазои ҳавоӣ, таъмини тартиби низоми интиқоли назорат дар ҳаракати ҳавоӣ мусоидат менамояд.
“Ҷонибҳо таъкид карданд, ки марказҳои хизматрасонии ҳаракати ҳавоӣ барои мубодилаи иттилоот оид ба ҳама гуна тағйирот дар вазъи амалиётӣ, ки ба ҳаракати расмиёти амалиётӣ таъсир мерасонанд, огоҳ мебошанд. Он бояд мавҷудияти таҷҳизот ва хизматҳо, иттилооти метеорологӣ, робитаҳои иртиботӣ ва маҳдудияти иқтидор барои системаҳои ATS-ро дар бар гирад”, - таъкид доштааст манбаъ.
Қайд карда шудааст, ки ҳамзамон мусоҳибон омодагии худро барои идомаи ҳамкории фаъол дар соҳаҳои афзалиятнок баён намуданд.