Раисҷумҳури Тоҷикистон Эмомалӣ Раҳмон ба президенти Афғонистон Ашраф Ғанӣ гуфт, "ба хонаи дувуматон хуш омадед".
"Бародари азизу гиромӣ! Ба хонаи дувуми худатон хуш омадед мегӯям. Сафари шумо расмӣ ҳам бошад, дар арафаи ҷашни аҷдодии мову шумо баргузор мегардад, иншоаллоҳ, ки баракаташ ба мардумони мо хело бештар мешавад", - афзуд президент Раҳмон.
Ғанӣ дар посух гуфт, ки омадан ба Душанбе ҳамеша дили маро боз мекунад. Хусусан дар Наврӯз, ки имкон медиҳад дӯстии мо амиқтару васеътар шавад", - изҳор дошт Ғанӣ.
Ва ӯ аз меҳмоннавозии раисҷумҳури Тоҷикистон сипосгузор шуд.
Дар ҳамин ҳол, Ашраф Ғанӣ аз президенти Тоҷикистон даъват ба амал овард, ки бо сафари ҷавобӣ ба Афғонистон ташриф оварад. Эмомалӣ Раҳмон ин даъватро қабул кард ва гуфт, дар нахустин фурсати муносиб меравад.