ДУШАНБЕ, 27 мар — Sputnik. Маросими домодию арӯсӣ акнун бо ширкати 100 меҳмон иҷозат дода шуд, дар ҳоле, ки ингуна маърака дар кишвар бо ҳузури ҳамагӣ 40 меҳмон доир мешуд.
Қарори навро Ситоди ҷумҳуриявӣ оид ба пурзӯр намудани чораҳои пешгирӣ аз паҳншавии коронавирус рӯзи 27 март қабул намуд, хабар медиҳад агентии Ховар.
Дар қарори ситоди мазкур чунин омадаст, ки :бо дарназардошти дар қаламрави кишвар беҳтар гардидани вазъи санитарию эпидемиологӣ вобаста ба сирояти коронавирус, баргузор намудани тӯйи домодию арусӣ бо иштироки то сад нафар бо риоя намудани чорабиниҳои беҳдоштӣ ва зиддиэпидемикӣ иҷозат дода шуд.
Мутобиқи қарори мазкур, вазорату идораҳо, ташкилоту муассисаҳо ва корхонаҳо муваззаф гардиданд, ки сарфи назар аз тобеияти идорӣ ва шакли моликият, инчунин, шахсони воқеӣ барои риоя намудани муқаррароти қарори мазкур чораҳои зарурӣ андешанд.
Ҳамчунин Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва мақомоти иҷроияи маҳаллии ҳокимияти давлатӣ вазифадор гардиданд, ки ҷиҳати таъмин ва риоя намудани чорабиниҳои беҳдоштӣ ва зиддиэпидемикӣ тадбирҳои заруриро роҳандозӣ намоянд.