ДУШАНБЕ, 23 мар – Sputnik. Сергей Лавров аз қатъ шудани равобити Русия бо ИА хабар дод. Ӯ дар ин бора пас аз гуфтушунид бо ҳамтои худ Ван И хабар дода, гуфт "Маскав бо Иттиҳодияи Аврупо ҳамчун созмон робитае надорад ва онро Брюссел хароб кард".
Ба изҳори ӯ, Аврупо тамоми муносибатҳое, ки солҳои дароз эҷод шуда буданд, хароб кард. Аз ин рӯ, минбаъд муносибатҳои Русия бо Чин зудтар рушд мекунад.
"Бори дигар таъкид мекунам, ки бо Иттиҳодияи Аврупо ҳамчун созмон мо робита надорем. Тамоми инфрасохтори ин равобит бо тасмимҳои якҷонибаи Брюссел хароб шуд", - тавзеҳ дод Лавров.
Аммо дипломати рус мегӯяд, агар Аврупо тасмимашро дигар кунад ва аз пайи бартараф кардани номутаносибҳое, ки худ дар муносибат бо Русия эҷод карду даст ба кор шавад, он гоҳ Маскав омодааст муносибатро дар заминаи баробарӣ ва дар пайи тавозуни манфиатҳо барқарор кунад.
Лавров ҳамчунин илова кард, ки "агар феълан дар муносибат бо ғарб ягон пешравӣ дида намешавад, Русия бо кишварҳои шарқ барномаҳои бузург дорад, ки ҳамасола равнақ меёбанд".
Ахиран, равобити Иттиҳодияи Аврупо ва Русия дар робита ба ном "парвандаи Навалний" сардтар шуд. ИА таҳримҳои нави зидди Русияро ҷорӣ кард. Вазорати корҳои хориҷӣ онҳоро "роҳи сарбаста ва ғайриқонунӣ" номид ва ваъда дод, ки ҳатман посух хоҳад дод.
Ба таъкиди котиби матбуотии президенти Русия, Дмитрий Песков, Кремл мутмаин аст, ки сиёсати таҳримот алайҳи Маскав ба ҳадафи худ нарасида истодааст.