ДУШАНБЕ, 19 мар – Sputnik. Рустами Эмомалӣ, раиси шаҳри Душанбе бо имзои қарор дар бораи баргузории озмуни Беҳтарин тарабхонаи пойтахт, ҳадафи онро рушди соҳибкорӣ, ҳавасмандгардонии соҳибкорон, беҳтаргардонии сифати хизматрасонӣ ва муаррифии фарҳанги меҳмоннавозӣ хондааст.
Комиссияи даври шаҳрии Озмуни “Беҳтарин тарабхона дар шаҳри Душанбе” эълон кард, ки ғолиби даври шаҳрии озмун тарабхонаи “Шарбат” мебошад. Роҳбарияти “Шарбат” ҷоизаи ғолиби озмуни “Беҳтарин тарабхонаи шаҳри Душанбе дар соли 2020” ва диплому туҳфаҳои хотиравии шаҳрдориро соҳиб гардид, иттилоъ дод котиботи ҳукумати пойтахт.
Манбаъ афзуд, ҳамзамон, ба тарабхонаҳои “Яккасарой”, “Дидор”, “Шаҳрисабз” ҷойҳои ифтихорӣ дода шуда, ба онҳо низ сипосномаю туҳфаҳои хотиравии шаҳрдолрии Душанбе тақдим гардид.
Котиботи шаҳрдорӣ тавзеҳ дод, ки дар асоси Низомнома тарзи дастархонороӣ, тарзи хизматрасонии пешхизмат, муносибати пешхизматону масъулини тарабхонаҳо бо мизоҷон, тарзи дурусти оро додани дастархон бо маҳсулоти хӯрока ва истифодаи санъати баланди ороишӣ ва ғояҳои мухталифи сарошпаз ва дигар нишондодҳо ба инобат гирифта шудаанд.