ДУШАНБЕ, 18 мар - Sputnik. Дар доираи ҳамкории байнидавлатӣ миёни Тоҷикистон ва Қазоқистон дирӯз намояндагони ширкати қазоқистонии ТОО "НТРС" бо мақсади ошноӣ бо фаъолияти кишоварзон ба шаҳри Турсунзода сафари карданд.
Дар ин бора котиби матбуоти раиси шаҳри Турсунзода Фируз Холиқов ба АМИТ "Ховар" иттилоъ додааст.
Тибқи иттилои манбаъ, меҳмононро раиси шаҳри Турсунзода Парвиз Акрамзода роҳбаладӣ намуда, онҳоро бо дастовардҳои кишоварзони шаҳр шинос намудааст.
Намояндагони ширкати ТОО "НТРС" аз ду хоҷагии деҳқонии шаҳри Турсунзода дидан кардаанд.
Дар Хоҷагии деҳқонии "Доно" вобаста ба усули парвариши сабзавоти барвақтӣ ба намояндагони ширкати мазкур маълумот пешниҳод гардид.
Ҳамчунин дар хоҷагии деҳқонии “Боғи Сомон” таваҷҷуҳи меҳмононро ба бунёди токзор, парвариш ва нигоҳдории навъҳои гуногуни ангур ҷалб намуданд.
Манбаъ афзуда, ки намояндагони ширкати қазоқистонӣ омодагии худро ҷиҳати ҳамкорӣ бо кишоварзони шаҳри Турсунзода иброз доштанд.